Главная » 2016 » Апрель » 2 » Сьылам комиöн
21:08
Сьылам комиöн

______________________________________________________________________________________

«Юргö танi коми сьыланкыв» - татшöм нима конкурсö пырöдчисны талун, апрель медводдза лунö, миян школаысь  6 «б» класса велöдчысьяс: Артеева Кристина, Артеева Ульяна, Витязева Василина, Истомина Мия, Пудкова Софья, Рочева Василина, Сергеева Алина, Сметанин Данил, Сметанина Эльвира, Чупрова Виолетта да Чухно Наталья. Тайö гажсö мöд во нин котыртöны Кельчиюр школаса велöдысьяс. Кыпыд руа, нюмбана, мича нывъяс да зонъяс, сiдзжö велöдысьяс паныдалiсны миянöс школа дорын, йöктöдлiсны, ворсöдiсны, некымынöс  весиг удитiсны доддя вöлöн катайтны. Ок, и гажа вöлi!

Школаö пырöм бöрын нин челядь кутiсны неуна волнуйтчыны: бура-ö петкöдчасны сцена вылын, оз-ö вунöдны кывъяссö и с.в. Но ставыс артмис лючки-ладнö. Сьылiсны челядь «Турияс» сьыланкыв, кодöс коркö вуджöдлöмаöсь роч кыв вылысь – песня «Журавли». Миян велöдчысьяслöн синъясын тыдалiс, мый найö зэв бура гöгöрвоöны сьыланкывсö - та вöсна, дерт,  и сьылiсны зэв бура. Кор челядь лэччисны сцена вылысь, менам öти тöдса ань гусьöн шуис: «Ме думайта, тiян лоас 1 места». Сiдз и лоис. Жюрилы тшöтш кажитчöма сьылöмыс.

Сiдзкö, эз весьшöрö ло Кельчиюрас ветлöмыс: челядь босьтiсны 1 тшупöда диплом, а нöшта налы козьналiсны коми гижысь А. Поповлысь небöг.

Зэв ыджыд аттьö окота шуны Кельчиюр школаса велöдысьяслы да велöдчысьяслы  тайö гажлунысь. Аттьö миян школаса директор Елена Георгиевналы, мый кыв шутöг сетiс миянлы автобус. Аттьö автобусöн веськöдлысь Прокопий Алексеевичлы миянöс бура новлöдлöмысь да ыджыд терпенньööн виччысьöмысь. И, дерт жö,  зэв ыджыд аттьö менам класса дона челядьлы «Юргö танi коми сьыланкыв» конкурсын зэв бура петкöдчöмысь, аттьö тшöтш и налы, кодъяс уна репетируйтiсны, но эз вермыны ветлыны миянкöд.

6 «б» классöн веськöдлысь Канева Ольга Николаевна

 

Просмотров: 1024 | Добавил: admin1 | Рейтинг: 3.6/7
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]